പരുന്തമ്മയും കോഴിയമ്മയും 🦅🐓

 

 പരുന്തമ്മയും കോഴിയമ്മയും 🦅🐔

ഒരു മരത്തിൽ കൂടുകെട്ടി പരുന്തമ്മ മുട്ടയിട്ടു. അവൾക്ക് മുട്ടവിരിഞ്ഞ് മൂന്ന് കുഞ്ഞുങ്ങളുണ്ടായി.

അതേ മരത്തിന്റെ ചുവട്ടിൽ കരിയിലകൾ കൂട്ടിയിട്ട് അതിൽ മുട്ടയിട്ട് ഒരു കോഴിയമ്മയും അടയിരിക്കുന്നുണ്ടായിരുന്നു. അവൾക്കും മുട്ടവിരിഞ്ഞ് മൂന്ന് കോഴിക്കുഞ്ഞുങ്ങൾ ഉണ്ടായി.

പരുന്തമ്മ ഒരു ദിവസം അതിൽ ഒരു കോഴിക്കുഞ്ഞിനെ റാഞ്ചിയെടുത്ത് പരുന്തിൻ കുഞ്ഞുങ്ങൾക്ക് തിന്നാൻ കൊടുത്തു.

“ഇനി എന്റെ കുഞ്ഞുങ്ങളെ റാഞ്ചിയെടുത്താൽ നിന്റെ കൂടിന് ഞാൻ തീവെക്കും,” കോഴിയമ്മ പരുന്തമ്മയ്ക്ക് താക്കീത് നൽകി.

എന്നാൽ പരുന്തമ്മ വീണ്ടും ഒരു കോഴിക്കുഞ്ഞിനെ റാഞ്ചി പരുന്തിൻകൂട്ടിലേക്ക് കൊണ്ടുപോയി. കോഴിയമ്മയ്ക്ക് അതുകണ്ട് സങ്കടവും ദേഷ്യവും വന്നു. അവൾ ചുള്ളിക്കമ്പുകളും കരിയിലകളും കൂട്ടിയിട്ട് പരുന്തമ്മയുടെ കൂടിന് താഴെ തീയിട്ടു. തീയും പുകയും പരുന്തിന്റെ കൂട്ടിലേക്ക് ഉയർന്നു. പരുന്തിൻ കുഞ്ഞുങ്ങൾ വീർപ്പുമുട്ടി കരയാൻ തുടങ്ങി.

അതു കണ്ടപ്പോൾ പരുന്തമ്മയ്ക്ക് സങ്കടമായി. അവൾ ഉടനെ കോഴിക്കുഞ്ഞിനെ കോഴിയമ്മക്ക്‌ തിരികെകൊണ്ടുപോയിക്കൊടുത്തു. ഒരു കോഴിക്കുഞ്ഞിനെ പിടിച്ചുതിന്നതിന് മാപ്പപേക്ഷിക്കുകയും ചെയ്തു.

കോഴിയമ്മ പരുന്തമ്മയോട് ക്ഷമിച്ചു.

അവൾ തീ കെടുത്തി പരുന്തിൻകുഞ്ഞുങ്ങളെ രക്ഷിച്ചു.

Share this

Best Malayalam Kathakal